يا بنت يـا أم المريلة كُحلـى
يا شمس هالة و طالة من الكولة
لو قلت عنك فى الغزل قولة
ممنوع علىّ ولا مسموحلى ؟
أنا احب اقول الشعر فى الحلوين
و الحلو اقوله يا حلو فى عيونة
و لو إبتديت بشفايفك النونو
ما يكفنيش فيهم سبع دواوين
يا ملاك يا جنية يا ست الحسن
يعجبنى توهانك فى أحلامك
يعجبنى شد الخصر بحزامك
يعجبنى أخدك للكتب بالحضن
راحوا الصبايا والصبايا جُـم
أجمل ما فيهم مين غير بنتي
وأاجمل ما فيك يا بنتي ان إنتى
فى عينيك الننى حنـان الأم
يا بنت يا ام المريلة كحلي
يا شمس هالة و طالة من الكولة
لو قلت عنك فى الغزل قولة
ممنوع علىّ والا مسموحلى ؟
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.